「晨型人」已經out 啦！

「晨型人」已經out 啦！

最近電視新聞記錄片叫 「晨型人」，每朝4:45分就起身，跑步、沖涼、陪仔仔食早餐送返學，然後睇新聞再嘆早餐，返到公司只不過8點，然後開始工作。講到早起一定會成功。外國雖然有唔少早起嘅成功例子，但現今上網時代，人類生活習慣改變，「早起定律」已經out 啦 ！反而做得夜晚上工作先會有效率，仲愈來愈多人證實一點。（小編都係！）

有外國職場文章列出以下原因，請大家自己深思：

1. 夜晚開工有「升壓渦」

根據外國一項關於「學習風格」（Survey of Research on Learning Styles）嘅研究，發現人要選擇同自己適合嘅時段開工，先有最大效果；早晚開工係兩種唔同模式—「晨型人」平穩消耗整天能量，成日都做到嘢，缺點係無一刻特別精神，反而夜晚開工，人嘅精神先有機會一嘢谷到高峰﹗

2. 奧巴馬係「夜型人」

「夜型人」唔一定失敗同差。University of Madrid一項研究，追蹤咗1000位年輕人嘅學業表現，發現夜晚先做嘢嘅學生，一般都成績較好，反映新一代自從互聯網嘅出現，已經改變。又指出，原來奧巴馬正正係「夜型人」嘅好例子，唔一定早起先成功。

3.  夜瞓IQ較高

根據倫敦政治經濟學院嘅研究（Why night owls are more intelligent），習慣夜晚開工嘅人，平均IQ較高，以下就係上床時間表同IQ嘅關係，習慣去到凌晨1:44分先瞓，可謂IQ爆燈。

4. 做得夜嘅人集中力較強

之前「晨型人」電視訪問話，早起身做完嘢可以唔使OT。但世事無咁完美，O唔OT完全睇老細。更重要嘅係，早起嘅人持久力弱﹗有比利時同瑞士科學家嘅聯合研究，將16位「晨型人」同15位「夜貓」對比，發現工作到後期（以10小時為基準），習慣早起身嘅人反應開始遲鈍；研究認為，除非早起可以於戶外醒神環境工作，否則同樣工時下，慣夜瞓嘅人，長工時嘅集中力會較強。所以老闆你明白，點解小編咁夜瞓啦！

5. 「晨型人」較難調配時間

有外國睡眠研究指出「夜貓」比「晨型人」更容易調配時間表。原來，「晨型人」呢個想法，係源於上世紀朝九晚五嘅產物，隨住打工唔只朝九晚五，「夜貓」反而更有彈性工作—早起嘅人，夜晚8點已眼瞓，工作只能聽朝做，反而夜瞓嘅人，朝早做又得，睡前做都得。

呢個年代，慣夜瞓都有唔少好處，唔係一定要5點鐘起身跑步先叫成功人士，一部分人可以成功，有些人跟住可能有反效果。反而夜啲瞓，都可以高效率工作，視乎是否適合自己！搵到自己最FIT的工作模式，自由調配時間，唔好墨守成規先會成功！時代已經變咗！老野！