《溏心3》賤男谷底翻身 唐文龍坎坷22年

唐文龍喺《溏心風暴3》同陳敏之有連場出軌情慾戲,角色賤爆但就被觀眾Like爆,成為劇中最受歡迎人物!48歲終於一嚐爆紅滋味,但其實入行22年的唐文龍有過唔少坎坷經歷,試過租住70呎劏房,為慳幾蚊唔敢坐巴士過海,窮到收埋自己唔敢媾女唔敢見人!終於捱出頭,唐文龍有人生格言:「自己選擇嘅,就唔好埋怨,等機會嘅時候,唔一定有結果,但就要練好自己把刀!」

唐文龍憑《溏心3》爆紅

唐文龍的爆紅程度絕對唔講得笑,早前佢出席活動後去銅鑼灣行街,僅停留幾分鐘已經引起人潮,個個爭住埋去同佢影相。群情愈來愈洶湧,唐文龍好快就俾廿幾三十人圍住,唔講仲以為佢做緊活動!可見唐文龍演的型佬教授阿Nic角色,真係深得民心!

曾住70呎板間房 唔敢去街

但成功背後,唐文龍有一段不為人知的辛酸史,原來唐文龍初入無綫時月入只得四千幾,更以月租千八元住喺旺角70呎板間房。生活都成問題,唐文龍直頭唔敢出街、唔見朋友,更唔好諗識女仔!「就算人哋請你食飯,請得多自己都唔好意思,AA制,叫碟餸都三十幾蚊,自己真係畀唔起!」唐文龍道。

為慳錢搭船過海

唐文龍當時用盡方法慳住使。佢感慨稱:「嗰時戶口長期只得幾百蚊,食飯都要計過度過, 廿幾蚊個快餐,凍飲加1元,但唔要飲品可以減3元,日日就係食快餐,唔飲嘢!為咗慳錢,過海唔敢搭巴士,只能坐天星小輪,坐完船,就喺尖沙咀行返旺角。」

患難兄弟曹永廉

守得雲開,唐文龍不忘感激當年幾個患難兄弟,當中就包括近年同樣在無綫捱出頭的曹永廉:「阿廉係我圈中第一個識嘅朋友,嗰時我哋兄弟之間有條規條,邊個有錢就邊個畀錢,佢都請過我食過唔少餐飯。試過有年嘅年初二,佢請我去酒家食象拔蚌,又一齊去買衫,真係好開心!」

設計系博士 放棄做設計師

雖然擁有設計系博士學位,當日卻決定放棄設計師工作,選擇追尋演員夢想,捱窮的日子,唐文龍一再強調無後悔:「既然選擇得留低,就一定要堅持,唔好放棄,等機會嘅時候,就要練好自己把刀,背脊要有好多把刀去行走江湖!機會嚟到先可以把握!」反而最過意不去,是要父母長年為他操心!「屋企人不嬲都唔想我做呢行,覺得花花世界,好唔穩定,但爸爸媽媽永遠都唔會講出口,只會表示支持,但我知佢哋心入面係好擔心我。」

直至去年一月,唐文龍終於遇到《溏心3》這個機緣,不過都因為呢個賤男角色,考慮了兩個星期:「始終離開十幾年,一返嚟就演呢種角色,最初自己都幾擔心,怕觀眾會唔接受,但最後都覺得,做演員要有挑戰,有時有話題有發揮,總好過做個平平淡淡嘅角色。」提到日前他在商場畀老中青數十市民圍住集郵,唐文龍百般感觸:「係好誇張!以前真係未試過,坦白講自己係開心嘅!依家會好好把握,唔諗其他嘢住,專心做好工作先,爸爸媽媽想抱孫,我都要佢哋遲啲先諗!」如果當時唐文龍選擇放棄,相信人生又會改寫!

發表迴響

你的電子郵件位址並不會被公開。 必要欄位標記為 *